ОБУКИ ЗА НАСТАВНИЦИ

“ЗАПОЗНАЈ СЕ СО СУПЕРХЕРОЈ НУЛА”

Во свет каде што еколошките предизвици стануваат сè поизразени, особено во урбаните средини, управувањето со отпадот – и тоа не само со класичниот комунален отпад, туку и со текстилниот – станува суштинско прашање. Текстилниот отпад претставува растечки проблем, а неговото непланско и несоодветно отстранување директно влијае врз квалитетот на воздухот, почвата и водата. За да обезбедиме почиста околина и поздрава иднина, неопходна е јавна едукација, ангажирање на најмладите и градење свест уште од рана возраст.

Токму затоа, Нула Отпад преку иновативни и креативни активности реализирани во образовни институции низ целата земја, активно работи на подигнување на јавната свест и градење на еколошка култура. Преку едукативни работилници, мултимедијални сликовници, детски каравани и интерактивни игри, се поттикнува љубовта кон природата, разбирањето за важноста на селекцијата и реупотребата, како и ангажманот за заштита на околината.

Акцентот е ставен на вклучување на децата како активни чинители и идни лидери на еколошките промени. Тие преку својот ентузијазам и креативност, учат дека и најмалите акции – како правилно одложување на батерии, носење платнени торби или реупотреба на стар текстил – можат да направат голема разлика. Со тоа, не само што се промовира одржливо живеење, туку се поставуваат и темелите на нова, одговорна генерација.

Бидејќи природата не ни е дадена засекогаш, туку е заедничка одговорност, да бидеме дел од решението. Да бидеме одговорни денес – за подобра иднина утре. Да научиме како правилно да се справиме со текстилниот отпад и да ја изградиме нашата заедница како пример за еколошка грижа и одржлив развој.

1. ЕДУКАТИВНА РАБОТИЛНИЦА ВО ООУ ЛАЗО АНГЕЛОВСКИ ОПШТИНА АЕРОДРОМ

(март  2022г. – Аеродром, Скопје)

радиме генерации кои во иднина ќе знаат и умеат како да ја зачуваат и заштитат животната средина.
Нула Отпад во “ООУ Лазо Ангеловски” – општина Аеродром, со промоција на детска сликовница „Суперхерој Нула“, поставување на еко корнер во училиштето со садови за рециклирање и едукативно-информативни постери, индивидуален сад за селекција на отпадни батерии за секое дете за дома и колоритни тетратки со ликот на Суперхеројот, игра еко меморија и задоволни и среќни деца.

Јас не можам да направам сé што ѝе потребно на планетата Земја, но на планетата Земја ѝ е потребно сѐ што можам да направам јас.
Да почнеме од себе – и потоа заедно!

2. “КАРАВАНОТ СУПЕРХЕРОИ” ПАТУВА ВО ООУ “ГРИГОР ПРЛИЧЕВ” ОХРИД

(мај  2022г. – Охрид)

Секое дете е главен јунак во својата приказна. А животната средина е неизоставен дел од сечија приказна. Во каков свет сакаме да живееме и како да го заштитиме?

Караванот на “Супер херои” продолжува и во Општина Охрид во ООУ “Григор Прличев”.

Креираме иднина со знаење и моќ за подобар и почист свет за нас и наредните генерации.

Училишните еколошки проекти даваат големи можности за остварување на целите на воспитувањето и образованието за животна средина. Училиштата по нив стануваат препознатливи за јавноста и го градат својот имиџ. Со овие проекти се поттикнува заедништво меѓу учениците, наставниците, воспитувачите, родителите и локалната заедница, со што се придонесува за демократизација на односите и подобрување на комуникацијата во училиштата и градинките.

Тоа што Нула Отпад го реализира како промоција на екологија во предучилишното и основното образование е навидум мала интервенција, но е голем влог во заедниците и иднината.

Поставена инфраструктура од садови за батерии во централното и подрачното училиште во населба Рача, реализирана е едукација во одделенска настава со промоција на детската сликовница „Суперхерој Нула“, со индивидуални садови за батерии за секое дете за дома.

3. “КАРАВАНОТ СУПЕРХЕРОИ” ПРОДОЛЖУВА ВО ООУ “ДРАГА СТОЈАНОВСКА” СОПИШТЕ

(мај  2022г. – Скопје)

Едукациите, кои Нула Отпад ги реализира, сé повеќе стануваат неопходни како резултат на големиот број нарушувања предизвикани од човекот врз планетата Земја. Брзиот начин на живот и развојот на технологијата предизвикаа човекот сé понесовесно да се однесува кон својата околина и да заборави на одредени важни фактори кои придонесуваат за поздрав живот и поздрава животна средина.

Воспитувањето и образованието за околината и одржливиот развој претставува интерес на пошироката општествена заедница, а неговите цели се усвојување знаења, обликување позитивни ставови и модели на однесување, како и оспособување за одговорно донесување одлуки.

Формирање индивидуи со изградени еколошки ставови и култура од најмала возраст води кон унапредување на животната средина и општеството во целина.

Краткорочни решенија и резултати нема во ова што ние го работиме. Активностите во училиштата и градинките ги спроведуваме континуирано од самите наши почетоци и така ќе продолжиме.

Со цел да се вклучат децата во едукација за еколошка свест, и да се одржат ангажирани, важно е да бидеме сигурни дека едукативните активности им се забавни за учество. Успехот е неминовен доколку допрете во активности што природно ги привлекуваат децата, како што е истражување, експериментирање, добра приказна со привлечна илустрација, активности својствени на детскиот развој на интерес за светот околу нив.

Во овие едукативни работилници на “супер херои“, ќе ја разбудиме вистинската моќ на малите – големи луѓе, нивната креативност, фантазија и нивната замисла за поубав и почист свет.

Поставена инфраструктура од садови за отпадни батерии во секое училиште, едукативни постери, сликовница Суперхерој Нула и мали садови за батерии за секое дете за дома.

Најголеми резултати за добивање на поинаква слика на нашето општество кога станува збор за селекција и рециклирање на опасниот отпад се постигнува преку креирање на таканаречени нови генерации, еколошки освестени и полни со знаење за начините на заштита и унапредување на животната средина.

4. “КАРАВАНОТ СУПЕРХЕРОИ” ПРОДОЛЖУВА ВО ООУ “ГОЦЕ ДЕЛЧЕВ” СВЕТИ НИКОЛЕ

(мај  2022г. – Свети Николе)

Едукативната и образовната вредност на природата тешко може да се прецени. Улогата на природата во воспитувањето и образованието на децата од најрана возраст е особено голема.
Развивањето на љубов кон природата, вештините за грижа за неа, грижата за живите суштества не предизвикува само когнитивен интерес, туку исто така придонесува за формирање на карактерни црти кај децата, како што се патриотизам, напорна работа, хуманост, почитување на работата на возрасните, заштита и природни извори.
Суперхеројот Нула е пресреќен што многу прекрасни деца се приклучија во неговата мисија за заштита на животната средина од опасниот отпад.
Уште една одлична едукативна дружба со учениците од ООУ Гоце Делчев од Свети Николе и посветениот наставен кадар од централното и подрачното училиште од с. Горубинци.

Поставени садови за отпадни батерии во двете училишта, мали индивидуални садови за батерии за дома за секое дете и секако сликовницата “Суперхерој Нула” како задолжено четиво во секој дом и училиница.

Посебно изненадување за децата – илустрирани тетратки со ликот на суперхеројот со еколошки пораки и еко стикери.
Убава енергија надополнета со знаење и желба заеднички да создадеме поубав свет за сите нас.

5. “КАРАВАНОТ СУПЕРХЕРОИ” ПРОДОЛЖУВА ВО ООУ БЛАЖЕ КОНЕСКИ ОПШТИНА АЕРОДРОМ

(јуни 2022г. – Скопје)

Како мисли и како постапува еден поединец, зависи каква личност оформил уште од детството. Семејното воспитување и стекнатото образование се главните насоки како една личност ќе созрева, па оттаму и какви ставови, мислења и постапки ќе има кон сѐ што го опкружува, пред сѐ кон зачувувањето на природната околина во која живее.

Од тие причини Нула Отпад инвестира во градење на генерации кои ќе знаат и умеат како да го зачуваат, заштитат и унапредат еко системот во кој живееме.

Сметаме дека доколку еколошката едукација е педагошки и дидактички осмислена и насочена, без разлика дали станува збор за формално или неформално образование, во тој случај неминовно дава резултат во вид на општествено посакувано однесување кое понатаму прераснува во навика и стил на живеење.

Генерално преку едукација на децата се обидуваме да внесеме еко култура во секој дом, со правилен пристап и соработка на родителите и наставниците, резултатите не изостануваат туку напротив се доста импресивни и мотивирачки делуваат на нашите идни заложби во тој домен.

Сликовницата Суперхерој Нулa достапна и за третооделенците од ОУ Блаже Конески. Поделени и индивидуални садови за батерии за секое дете за дома.

6. ЕКО БУБАМАРКИ” ВО ЈУДГ БУБАМАРА ВО НАСЕЛБА АЕРОДРОМ

(јуни 2022г. – Скопје)

Едукативните работилници Нула Отпад ги организира во соработка со општините и воспитно-образовните институции и ги опфаќа децата на предучилишна и училишна возраст.
При самите едукации се почитуваат стандардите за рано учење и развој кај предучилишните деца.
Мултимедијален пристап во изучување на нова содржина, презентација на дигитална сликовница, дизајн и производ на Нула Отпад, дидактички осмислена преку мултимедијалните елементи: текст, цртеж, слики, подвижни слики, анимации и нараторски говор, прилагодена на специфичностите и особеностите на предучилишниот период кај децата.

Благодарение на ваквиот пристап, преку симулација на ситуации кои им се блиски на децата, кај нив се создава чувство дека можат да ја разберат, да соработуваат со околината која ги опкружува и да ги контролираат настаните во неа. На тој начин создаваме трајни знаења кои понатаму прераснуваат во здрави навики и примерно однесување кон животната средина и живиот свет во неа.

По повод Светскиот ден на животната средина, кој е најзначајниот ден за поттикнување на глобалната свест за заштита на животната средина, се дружевме со прекрасните деца од градинката Буба Мара од Општина Аеродром.

Низа интересни активности за да научиме како треба да постапуваме со опасниот отпад и како да ги одржиме почвата, водата и воздухот чисти, како и промоција на детската сликовница “Суперхерој Нула”.

7. ЕКО ХЕРОИ ВО ООУ “НАУМ НАУМОВСКИ БОРЧЕ” ГАЗИ БАБА

(септември 2022г. – Скопје)

Јас не можам да направам сѐ што ѝ е потребно на планетата Земја, но на планетата Земја ѝ е потребно сѐ што можам да направам јас” – од овие зборови тргнавме на нашето едукативно дружење со учениците од ООУ Наум Наумовски Борче од Скопје.

Да не заборавиме дека со мали промени во нашите навики правиме голема промена за животната средина, која ни припаѓа на сите нас, но и на генерациите по нас.

Да користиме Еко Линија 070 236 000 за правилно и бесплатно одлагање на електронскиот отпад од нашите домови/компании и да бидеме иницијатори на еколошки движења во нашата поблиска средина.

8. ЕКО ХЕРОИ ОД ПООУ ДРАГА СТОЈАНОВСКА ОД ДОЛНО СОЊЕ

(септември 2022г. – Скопје)

Посветено продолжуваме со еколошката едукација како траен влог во иднината кој ќе најави една смена на генерации кои ќе знаат и умеат како да ја зачуваат и унапредат животната средина.

Денес се дружевме со прекрасните дечиња од ПООУ Драга Стојановска од Долно Соње и посветените наставници кои несебично се залагаат за доближување на овие значајни теми до секое дете.

Да ги одржиме воздухот, водата и почвата чисти.
Од нив зависиме сите!

9. ЕКО ХЕРОИ ВО ООУ “БРАЌА МИЛАДИНОВЦИ” АЕРОДРОМ

(септември 2022г. – Скопје)

Заедно креираме визија за подобар и почист свет, увидувајќи што за него можат да направат децата и возрасните.
”Караванот на Супер Херои” создава еко херои меѓу децата кои во иднина ќе знаат како да ја сочуваат и унапредат животната средина.

Денешните еко херои се учениците од ООУ Браќа Миладиновци од општина Аеродром.

10. СУПЕРХЕРОЈ НУЛА ПОМОШНИЦИ ОД ООУ “ДИМИТАР МАКЕДОНСКИ” ОПШТИНА АЕРОДРОМ

(октомври 2022г. – Скопје)

Суперхеројот Нула од денес има свои помошници, а тоа се третодделенците од ООУ Димитар Македонски од општина Аеродром.

Научивме дека на Суперхеројот Нула му е потребна целата помош која може да ја добие за да ги заштити нашата почва, воздух и вода од електронскиот отпад и отпадните батерии.

Тој е еден, а ние луѓето сме многу, и тој не може да исчисти толку колку што ние луѓето можеме да извалкаме.

Научивме како, научивме зошто!

11. “ КАРАВАН СУПЕРХЕРОИ” ВО ОПШТИНА МАВРОВО И РОСТУШЕ

(октомври 2022г. – Маврово)

Караванот на Супер Херои низ пределите на прекрасната општина Маврово и Ростуше.
Во соработка со невладината организација Зеукстритон реализирани се едукативни работилници во Жировница, Требиште, Ростуше и Скудриње.

Поставена инфраструктура од садови за батерии и ситен електронски отпад во секое училиште, едукативно-информативни постери за селекција на ОБА и ОЕЕО, мали садови за батерии и сликовница Нула Отпад и тетратка со Суперхеројот Нула за сите деца од одделенска настава 1–5 одделение.

Во овие едукативни активности вклучени беа:
ОУ Хајан Селмани с. Ростуше
ОУ Јосип Броз Тито с. Жировница
ПУ Хајан Селмани с. Требиште
ОУ Блаже Конески с. Скудриње

Заедно креираме визија за подобар и почист свет, увидувајќи што за него можат да направат децата и возрасните.

 “РЕАГИРАЈ И СЕЛЕКТИРАЈ”

Во свет кој се менува сè побрзо, детската едукација за животната средина не е повеќе избор — туку неопходност. Преку креативни, едукативни и интерактивни активности, Нула Отпад вложува континуирани напори за подигање на еколошката свест кај најмладите, градејќи основи за генерации кои знаат, умеат и се грижат.

Од предучилишна возраст до основно образование, децата низ различни општини низ Македонија се вклучуваат во еко-иницијативи каде учат за реупотреба, рециклирање, правилно одлагање на отпадот и, пред сè, за вредноста на зачувување на воздухот, водата и земјата. Погледнете дел од реализираните активности кои инспирираат, едуцираат и оставаат трајно влијание.

1. ДЕТСКА НЕДЕЛА СО ГРАДИНКА БУБА МАРА

(октомври 2022г. – Аеродром, Скопје)

Секоја година, првата седмица од месец октомври им се посветува на децата под мотото Детска недела, а првиот ден од Детската недела е Универзалниот Ден на детето.

Одговорноста за децата е на целата заедница, на сите нас. Светот останува на децата и претставува предизвик да ги научиме да ги спознаат вистинските вредности во животот и да им дадеме сила да истраат и да успеат во овој свет таков каков што е.

Последиците од неправилно отстранување на опасниот отпад се најголеми кај децата и фетусите поради нивната мала маса и затоа што се во развој.

Оваа година Детската недела ја организиравме заедно со децата од градинката Буба Мара од населба Аеродром. Со паролата “Ги браниме нашите права за животна средина здрава”, се предвидени низа креативно-едукативни активности со иновативен и интерактивен пристап. Преку симулација на ситуации блиски на децата, се создава чувство дека можат да ја разберат околината, да соработуваат и да контролираат настани, со што се создаваат трајни знаења кои прераснуваат во здрави навики и примерно однесување кон животната средина.

Едукативните активности беа заокружени со заеднички настан, каде децата се претставија пред своите родители, креираа семејно стебло од реупотребени материјали, и испратија порака дека природата ни припаѓа на сите нас – и на генерациите што доаѓаат.
Јас не можам да направам сѐ што ѝ е потребно на животната средина, но на животната средина ѝ е потребно сѐ што можам да направам јас. Да почнеме од себе и да мотивираме што повеќе луѓе да се грижат за себе и за природата.

2. “РЕАГИРАЈ И СЕЛЕКТИРАЈ” ЕКОЛОШКА АКЦИЈА ВО ООУ ВЕРА ЈОЦИЌ ОПШТИНА ГАЗИ БАБА

(март  2022г. – Скопје)

Го одбележуваме Меѓународниот ден на електронскиот отпад со еколошка акција заедно со децата од ООУ Вера Јоциќ.

Месец октомври се одбележува со цел да се подигне свеста за растечкиот проблем. Во 2021 година имаме алармантна статистика – 57,4 милиони тони електронски отпад, количина што ја надминува тежината на Кинескиот Ѕид.

Едукациите на Нула Отпад стануваат сè поважни, бидејќи човековото влијание врз планетата е во пораст. Брзиот живот, технологијата, и недоволната информираност создаваат ниска еколошка свест, што води кон негрижа за животната средина.

Во тој контекст, Нула Отпад реализираше едукација со интерактивна програма:

• поим за батерии и електронски отпад

• примарна селекција

• заштита на здравјето и животната средина

• еколошко прифатливо отстранување на отпадот

Учениците активно учествуваа со сопствени идеи за подобрување на мерките.

Во знак на одбележување на 14 Октомври, спроведена е акција за собирање батерии и електронски отпад од дома.

Нашите еко супер херои ги исчистија своите домови и научија како да продолжат со правилни навики. Да им се придружиме – старите батерии во кантите на Нула Отпад, а електронскиот отпад преку Еко Линијата 070 236 000.

3. ЕКО ГЕНЕРАЦИИ ВО ООУ “БЛАЖЕ КОНЕСКИ” ОПШТИНА АЕРОДРОМ

(март  2022г. – Скопје)

По повод Меѓународниот ден на електронскиот отпад, учениците од 4 и 5 одделение од ООУ Браќа Миладиновци – општина Аеродром, се приклучија на Еко Караванот на суперхерои.

Создаваме генерации за подобра иднина и чиста, здрава животна средина за сите.

Едукативните работилници се мала интервенција во едно одделение, училиште или општина, но се сериозен влог во иднината.

4. ПЛАНЕТА СО И БЕЗ ЕЛЕКТРОНСКИ ОТПАД СО ООУ ДРАГА СТОЈАНОВСКА ОПШТИНА СОПИШТЕ

(март  2022г. – Скопје)

Планета со електронски отпад или без него?!

Со децата од ООУ Драга Стојановска од Општина Сопиште, го одбележавме Меѓународниот ден на електронскиот отпад.

Со убави пораки за селекција и рециклирање и со песната “Нула Отпад” од Детскиот фестивал Поточиња, го заокруживме денот со порака за правилна селекција на електронскиот отпад и отпадните батерии.

 “ПРИЈАТЕЛСТВО СО ПРИРОДАТА”

Во ерата кога климатските промени и загадувањето стануваат сè поголем глобален предизвик, локалните заедници ја преземаат иницијативата преку образовни, креативни и одговорни активности. Со постојана соработка меѓу општините, училиштата, градинките и граѓаните, Нула Отпад создава вистински еко-херои меѓу најмладите, вложувајќи во нивната еколошка свест и однесување од најрана возраст.

Од иновативни натпревари со рециклирани маски до поставување инфраструктура за отпадни батерии, од едукативни дефилеи до интерактивни работилници – ова се приказни за соработка, инспирација и посветеност. Приказни што докажуваат дека еко-активизмот е возможен, достапен и заразен – особено кога започнува од децата.

1. “ЕКО ПАРАДА НА Е-КАПИТОЛИЈАДА” ОПШТИНА АЕРОДРОМ

(март/април 2022г. – Скопје)

Во насока на јакнење на јавната свест за заштита на природата и здравјето на луѓето, неколку години наназад, веќе традиционално, НУЛА ОТПАД во соработка со Капитол мол и Општина Аеродром поттикнува иницијатива за изработка на маски од електричен отпад кои ќе бидат презентирани во форма на дигитална кампања на социјалните мрежи на Капитол мол под името Е-КАПИТОЛИЈАДА.

Во Изборот на најдобра еко маска право на учество имаа сите деца од Општина Аеродром, вклучувајќи ги сите градинки и училишта (основно образование, 1–9 одделение) од општината.

Учесниците во Изборот на најдобра еко маска имаа за задача да изработат индивидуална креативна маска во која ќе имаат вклучено најмалку 3 стари и неисправни електронски и електрични уреди или стари и потрошени батерии, а оваа година беше вклучена и можноста за изработка на групна маска.

Фотографија од направената еко маска децата и родителите имаа за задача да ја испратат во директна порака на фејсбук профилот на Капитол Мол, заедно со уредно пополнета и потпишана пријава од родител/старател најдоцна до 01.04.2022 година до 16 часот.

НУЛА ОТПАД, за најдобрите три маски обезбеди три главни награди. Од стручно жири беа доделени две награди – прва награда блутут безжични слушалки и втора награда паметен часовник, додека една награда беше доделена за најлајкувана фотографија на социјалните мрежи на Капитол Мол (фејсбук + инстаграм) – гејмерски сет (слушалки, тастатура и глувче).

За категоријата најлајкувана фотографија важечки беа гласовите од објавата на фотографијата до 03.04.2022 – 12 часот.

Постери за Е-Капитолијадата беа доставени до сите осум основни училишта и двете градинки под надлежност на Општина Аеродром.

На еко маскенбалот учествуваа 29 еко маски.

Стручното жири беше составено од следниве членови:
• Марјан Дамески – Нула Отпад
• Оливера Дебарлиева – Капитол Мол
• Билјана Кочоска – Општина Аеродром

Добитниците на наградите беа објавени на 05.04 во 12 часот, а истите беа доделени следниот ден на платформата во Капитол Мол.

Заради големиот број на квалитетни маски беа доделени уште три дополнителни награди, две за групни маски од соработниците на Капитол Мол и една специјална награда од Нула Отпад.

За сите останати учесници Нула Отпад обезбеди благодарници за учеството.

Заради подобрување на ситуацијата со пандемијата беше организирано и првоаприлско дефиле за презентација на најдобрите маски.

2. “ЕКОЛОШКИ ПЛАН”  ОПШТИНА БОСИЛЕВО

(мај 2022г. – Скопје)

Согласно договорот за взаемна соработка Нула Отпад е партнер на Општина Босилево во делот на заедничко делување за правилно управување со електричниот и електронски отпад и отпадните батерии на територијата на општината.

Правилното управување со отпадот допринесува до зачувување на природните ресурси, заштедува енергија и ги намалува емисиите на стакленичките гасови кои придонесуваат за глобални климатски промени, со што ќе овозможиме зачувување на здрава и зелена околина за идните генерации.

Во таа насока се реализираше едукативна кампања на територијата на општина Босилево за правилна селекција на електронскиот отпад и постапување со истиот, како и воспоставување на систем за управување на отпадните батерии во корпа за рециклирање во јавните институции на територијата на општината.

За таа цел Нула Отпад достави 20 садови за батерии во следниве институции:

• “ООУ Гоце Делчев” со едно централно и седум подарчни училишта;

• “ООУ Кирил и Методиј” Иловица, централно училиште со три подарчни училишта;

• ООУ Борис Трајковски, Моноспитово, централно училиште со едно подрачно училиште;

• Културно-едукативен центар с. Босилево;

• Детска градинка “Среќни насмевки”;

• Детска градинка “Мајски цвет” с. Моноспитово.

Вкупно 900 деца беа опфатени со едукација и добија мали индивидуални садови за отпадни батерии за дома, додека првачињата добија и едукативна сликовница Суперхерој Нула и брендирани тетратки со суперхеројот со еколошки пораки и стикери.

Во Моноспитово и Иловица, дел од едукативните активности беа реализирани онлајн со дигитална едукација.

Нула Отпад и Општина Босилово преку едукативна кампања создаваат супер херои меѓу децата кои ќе знаат како да ја зачуваат и унапредат средината во која живееме.
Заедно ја креираме визијата за поубава иднина, увидувајќи што за неа може да направат децата и возрасните.

3. “ГАЗИ БАБА СЕ ГРИЖИ ЗА ЖИВОТНАТА СРЕДИНА” ОПШТИНА ГАЗИ БАБА

(јуни 2022г. – Скопје)

• „Гази Баба се грижи за животната средина“ – го одбележуваме Светскиот ден за заштита на животната средина во соработка со Општина Гази Баба.
• Позиционирање на еколошко однесување и обврска за задолжителна рециклажа е сериозен елемент на деловниот имиџ на секоја општествено одговорна општина.
• Огромните количини енергија и материјали кои ги троши општеството создаваат многу отпад кој го загадува воздухот, водата и почвата, со сериозни закани за глобалната животна средина.

Да се грижиме заедно и да не дозволиме опасниот отпад да заврши на депонија.

Општина Гази Баба, во соработка со Друштвото за управување со отпад Нула – Отпад, одржа настан на кој учествуваа ученици од ООУ Дане Крапчев и ООУ Стив Наумов.

По настанот, градоначалникот Стефковски заедно со учениците и претставниците на Нула – Отпад поделија платнени торби на жителите на Автокоманда, со порака за некористење на пластичките ќеси, што ќе доведе до намалување на отпадот.

За сите деца учесници беа поделени сликовници од Нула Отпад и промотивен материјал – тетратки со Суперхеројот Нула.

4. “ПРИЈАТЕЛСТВО СО ПРИРОДАТА” СО ОПШТИНА ГАЗИ БАБА

(јуни 2022г. – Скопје)

Во универзумот има билиони галаксии. Во нашата галаксија има билиони планети. Но само една е Планета Земја.

Го прославуваме Денот на животната средина – 5 јуни со слоганот: „Планетата Земја е ЕДНА!“

По повод овој ден и со мотото „Пријателство со природата“, Нула Отпад во соработка со Општина Гази Баба и Амбасадата на Република Словенија во Република Македонија организираше еколошка акција за чистење на Парк шумата Гази Баба.

Оваа акција се организираше во рамки на активностите на Општина Гази Баба по повод Меѓународниот ден за заштита на животната средина.

Се грижиме заедно.

5. “КУЛТУРА ПОД НЕБОТО” – КУЛТУРНА МАНИФЕСТАЦИЈА НА ОТВОРЕНА СЦЕНА ВО ПАРКОТ НА ФРАНКОФОНИЈА СО БАЛФРОГС УЧИЛИШТЕ ЗА БАЛЕТ ОПШТИНА ЦЕНТАР

(јуни 2022г. – Скопје)

31 мај (вторник) со почеток во 17 часот, Нула Отпад со креативна едукативна работилница за деца за правилна селекција на електронскиот отпад и отпадните батерии, игровни активности и промоција на детска сликовница “Суперхерој Нула”.

Активности кои ги ставаат луѓето во фокусот, поттикнувајќи ги децата на креативност и творење, негувајќи вредности како другарство, инклузија и грижа за себе и околината.

Сликовниците и креативноста играат голема улога во правилниот развој, особено кај децата од предучилишна и рана училишна возраст. Нашата цел е еколошките елементи да ги вклопиме во една забавна авантура, која преку игра и песна ќе придонесе кон квалитетна еко едукација.

На самиот настан децата и возрасните ќе имаат можнoст низ игра и забава да се информираат за опасноста од неправилно отстранување на електронскиот отпад и отпадните батерии, како и да дознаат како тоа правилно да го направат без да го загрозат сопственото здравје и животната средина.

За време на настанот беше поставена инфраструктура од садови за батерии и ситен електронски отпад, каде граѓаните и децата имаат можност на правилен начин да се ослободат од истиот.

Од 16 мај до 15 јуни, на отворената сцена на Булфрогс балетското школо во Паркот на Франкофонијата се одржуваше манифестацијата „Култура под небото“. Проектот е во организација на Булфрогс Балет, Булфрогс продукција и Општина Центар.

РЕАЛИЗИРАНИ ОБУКИ ЗА НАСТАВНИОТ КАДАР ОД СЕПУГС “ВАСИЛ АНТЕВСКИ ДРЕН СКОПЈЕ”
(2021)

Во периодот од 18 август до 19 декември, 2021 година, Академија ЦЕС реализираше неколку обуки за наставниот кадар од СЕПУГС Васил Антевски Дрен од Скопје:

• Team Building – Градење тимови и тимска работа
• Личен план за професионален развој на наставниците и стручните работници
• Подобрување на дигиталните вештини во наставата преку учење на нови ИКТ Miro, Gather town и e Twinning платформата

Поради настанатите здравствени околности, предизвикани од пандемијата Ковид19, дел од наставниците следеа обуки со физичко присуство, а останатите следеа обука онлајн, преку платформата zoom.

За сите учесници во обуката беа обезбедени соодветни просторни услови за работа и изготвени соодветни материјали за работа.

По завршување на обуките, сите учесници, беа соодветно сертифицирани.

За успешна реализација на обуките, беа ангажирани повеќе предавачи: проф. Д-р. Константин Петковски, Владимир Карев, Љупка Ристовска, Драган Атанасов, Драган Маркоски и Катерина Митковска.

Галерија:

РЕАЛИЗИРАНИ ОБУКИ ЗА НАСТАВНИОТ КАДАР ОД СЕПУГС “ВАСИЛ АНТЕВСКИ ДРЕН СКОПЈЕ”
(2022)

Во периодот од 17 до 18 декември, 2022 година Академија ЦЕС реализираше неколку обуки за наставниот кадар од СЕПУГС Васил Антевски Дрен од Скопје. Обуките се одвиваа во Скопје и во Велес.

Темите коишто беа опфатени беа:

1. Меѓуетничка интеграција во образованието
2. Училишна клима и култура со акцент на инклузија, дигитализација и тимска работа
3. Образовни модели – од традиционално во современо учење (студии на случаи)

За сите учесници во обуката беа обезбедени соодветни просторни услови за работа, како и соодветни материјали за работа. По завршување на обуките, сите учесници добија сертификати.

За успешна реализација на обуките, беа ангажирани повеќе предавачи и тоа: проф. Љупка Ристовска, проф. Владимир Караев, м-р Мирлинда Реџепи, проф. д-р Елизабета Томевска-Илиевска и м-р Даријан Трајанов.

Галерија:

ПОЛИТИКА ЗА КВАЛИТЕТ ЗА ОБРАЗОВНИ
УСЛУГИ